ملخص درس التحولات الكبرى للعالم الرأسمالي والانعكاسات ديالو خلال القرن 19 بالدارجة

تقديم 

كما كانعرفو أن مادة الإجتماعيات هي من بين أهم المواد هاد العام بالنسبة لتلاميذ البكالوريا علوم بحكم وكيما كانعرفو كاملين كاين امتحان جزئي فاخر السنة ودابا غادي نبداو على بركة الله بشرح أول دروس هاد السنة لي هو عبارة عن تقديم عام ،هاد التقديم العام غادي يكون كايتمحور حول التحولات الكبرى للعالم الرأسمالي والانعكاسات ديالو خلال القرن 19 وبدايات ديال القرن 20،إذن دابا ملي عرفنا شنو كاين ندوزو لمقدمة الدرس ديالنا لي كاتقول لينا،أن هاد التطورات لي غادي يعرف لينا العالم الرأسمالي ماجاتش بين يوم وليلة ،بل كان السبب ديالها هو واحد المجموعة ديال التحولات والتغييرات لي وقعات فبزاف ديال المجالات على وجه الخصوص التحولات الاقتصادية والاجتماعية والفكرية وهاد التحولات ماكانتش عندنا تاهي وماحصلاتش إلا بعد واحد الثورة لكاتسمى بالثورة الصناعية في أوروبا الغربية ،وهاد الثورة الصناعية لي ذكرنا قبل قليل أدت لينا لواحد جوج مسائل لي هي تطور النظام الرأسمالي وتزايد التنافس الاستعماري ،وهادشي كامل غادي يأثر لينا واحد التأثير كبير على العالم ككل خلال القرن 19 والبدايات ديال القرن 20 ،وكلشي هاد التحولات وكذلك هاداك التطور لي عرفو النظام الرأسمالي وتزايد التنافس الاستعماري... هاد العوامل كاملة هي لي غادي تمكنا من اكتشاف الإطار الزمني والمكاني أي الزمن والمكان أو الأماكن والأزمنة لي غادي تكون كاتمر فيه دروس هاد السنة لي مادة التاريخ وهادشي كامل غادي خلينا نطرحو واحد السؤال لي هو .
ما هو الإطار الزمني والمكاني لبرنامج مادة التاريخ؟

1)الإطار الزمني بالعالم الرأسمالي كمركز:

 

أول حاجة خاصنا نعرفوها هي شنو هو هاد النظام الرأسمالي أو الرأسمالية،لي غادي نسمعوها بزاف فهاد الدرس ،إذن الرأسمالية هي كاتعرف بواحد الاسم آخر كذلك لي هو التمول وهي عبارة على واحد النظام اقتصادي كايقوم بالخصوص على الملكية الخاصة،اي أن التجار والفلاحين ...غادي يوليو يتصرفو بوحدهم فالمداخيل ديالهم بدون التدخل ديال الدولة كيما كان قبل،ودابا ندوزو لمعرفة البرنامج الزمني لي غادي تمشي لينا فيه دروس مادة التاريخ هاد العام ،فكما سبق لينا قلنا فالمقدمة أن برنامج زمن الفترة التاريخية هي من القرن 19 م إلى بدايات القرن 20،وهاد الفترة عرفات واحد المجموعة ديال التطورات المهمة بالخصوص بعد ماظهرات لينا الآلة البخارية اللي غادي تادي لينا للتطور ديال الصناعة ووسائل المواصلات وكذلك ازدهار المبادلات التجارية والتطور ديال الابناك،ومانساوش تزايد الحاجة للموارد الأولية وأيضا الأسواق الاستهلاكية ،هاد العوامل كاملة هي لي غادي تادي لينا لاشتداد التنافس الاستعماري بين الدول الرأسمالية،وهادشي غادي يادي لينا فالتالي لتطور واحد الحركة لي هي الحركة الإمبريالية،وهاد التنافس التنافس الإمبريالي نتج عليه تصاعد نحو التحالفات وكذلك التسابق نحو التسلح أي شراء الأسلحة ومعدات الحرب وهادشي كامل من أجل استعمار البلدان لتجاوز الأزمة ديال تزايد الطلب على المواد الأولية والأسواق ،وهاد العوامل كلها هي لي غادي تكون لينا سبب من أسباب قيام الحرب العالمية الأولى ،وعلى العموم يمكن لينا نحصرو هادشي كامل لي ذكرناه فيما يلي:

سياسيا:
تعزيز وترسيخ الدور والمكانة اللي كانت كاتشغلها الدولة الأمة وهادشي داخل لينا فيما كانسميوه بتفشي النزعة الليبرالية والقومية.

اقتصاديا واجتماعيا:
تعزيز المكانة ديال الرأسمالية الليبرالية وهنا غادي غادي يظهر لينا واحد الحاجة جديدة لي هي مجتمع راسمالي جديد.
فكريا:كاتمثل لينا هاد التحولات فبروز واحد الفكر جديد لي هو الفكر الاشتراكي الشئ اللي غادي يخلي الشركة النقابية تطور وتبلور من حيث الفكر والممارسة.

الإطار المكاني لموضوع البرنامج:

هنا غادي نتكلمو على أوروبا لي عرفات لينا براسها كاع هادوك التحولات تقريبا لي شهدها العالم الرأسمالي في القرنين 19و 20،ففي أوروبا ظهرات لينا واحد الثورة ولي هي الثورة الصناعية وهي لي غادي تعطينا الشرارة والدافع الأول لانطلاق الحرب العالمية وهادشي ماتحصرش غير فاوروبا بل حتى القارة الإفريقية تاثرات خاصة في الشمال ديالها،فالمغرب تعرض لواحد ظغوطات امبريالية ولي غادي تنتهي لينا بفرض الحماية على المغرب بالرغم من المحولات ديال الإصلاح اللي حاولو التطبيق ديالها،وهاد الأوضاع المتردية داز منها حتى المشرق العربي اللي عرف بالدور ديالو أحداث مهمة ،في الإطار ديال الأراضي والمستعمرات ديال الإمبراطورية العثمانية ومحاولات التحديث لي عرفاتها مصر فهاديك الفترة.

صياغة إشكالية مناسبة لموضوع البرنامج:

كاتطرح علينا الإشكالية ديال نعرفو البرنامج ديال دروس التاريخ هاد العام باش نسترجعو المكتسبات ديال المادة من حلال نعرفوج شنو هما التحولات المهمة لي شهدها العالم الرأسمالي وكفاش اثرات لينا على باقي الدول بالخصوص دول المغرب العربي (في الفترة دياب فرض الحماية على المغرب)وكذلك المشرق العربي لي كايتمثل في الضغوطات الإمبريالية على الإمبراطورية العربية،ومحاولات الاستقلال المصرية،من هنا كايتوضح لينا أن هاد التحولات شملات لينا مجموعة من المجالات(اقتصادية،سياسية،اجتماعية،فكرية)
وكذالك التعدد ديال الجغرافية بين دولية،اقليمية،ووطنية،وهنا غادي نوصلو لواحد الفكرة لي هي الربط ديال الأشياء الداخلية بالخارجية،وهادشي غادي يخلينا نطرحو واحد الأسئلة فرعية ديال البرنامج وهي كالتالي:

خاتمة

وكخلاصة لهادشي كامل لي دوينا عليه كايتوضخ لينا أن برنامج المادة التاريخية لهاد السنة كايمتد من القرن 19م إلى بداية القرن 20م،وكايشمل لينا جميع هادوك التحولات اللي عرفها النظام الرأسمالي ولي انعكسات وشملات لينا باقي مناطق العالم فيما بعد.