القائمة الرئيسية

الصفحات

تجربتي لتعامل مع المواد و لأحدات و الأشخاص في البكالوريا


تجربتي مع مواد البكالوريا


السلام عليكم ورحمة الله وبركاته.
في هدا المقال سوف أقدم لكم تجربتي مع البكالوريا تحديدا تخصص شعبة علوم الحياة ولأرض، أنصحك بقراءة هده التجربة حتى الأخير سوف تستفيد منها إن شاء الله لكي لا تقع في نفس الأخطاء التي وقعت فيها والتي كلفتني ثلاثة سنوات من حياتي، بالإضافة إلى أنه في أخير هدا الموضوع سوف أقدم لك طرق إكتسبتها من تجربتي سوف تساعدك على الدراسة ومراجعة المواد لتتحصل على نقط جيدة بإدن الله، هده الطرقة التي وضعتها في أخير المقال تشمل طريقة تعامل مع المواد و طريقة التعامل مع الأحدات والأشخاص التي سوف تواجهك في الباك .

كفاش خديت الباك بعد 3 سنوات


في بحال اللية لبارح من السنة الماضية عرفت راسي نجحت في الباك من بعد معاناة وتجربة لمنساهاش وباقا مستمرة على عزفها ليومنا هذا، آه لحقاش أنا هي هاديك البنت لما خداتش الباك بالساهل أنا هي لخدات الباك في 3 سنوات ماشي عن كسل وإنما لظروف مؤثرة أكثرها صحية، انا هي البنت لبعيدة عليها ليسي وكتمشي في النقل المدرسي في ظلام وكترجع في ظلام كنبقى نهار كلو تما كنتغدا حدى باب ليسي برد وحرارة وكلشي عليا، ولكن كبريائي المتعجرف وروحي المرحة مخلاتش هادشي أثر عليا وكنت كنجيب نقط مشرفة ليا بالدرجة الأولى لحقاش أنا لعرفت المنبع ديالهم وما عمرني قريت باش نرضي شي حد من غير دارنا.


الجزء الأول: بداية القصة مع الباك


مهم جا لباك ( تخصص علوم الحياة والارض) لتجربتو ما نساهاش دوزتو بخير بنفس المعاناة لكن حامدة الله  حفظت ووجدت وجا نهار الوطني فقت في صباح لقيت ألم في الراس يستحيل نوصفو  ما قدرتش نهبط راسي ونشوف في وربقة كنشوف في سقف ونحاول ما أمكن ما نحركش راسي وما نرمش بزاف باش ما نتألمش كثر.. يستحيل نهضر ولا نضحك حقاش كنبغي نغوت بحر الألم  مادوزتش مزيان وكين المواد لخرجت بلاما نكتب والو..مانجحتش في العادية وتلاحيت استدراكية ودوزتها بنفس الامر والألم وجبت رغم قساوة الأمر نقطة كبر من الأولى ولكن مانجحتش في حين بنات العائلة وصحاباتي ولكنعرف نجحو ..لكن هادشي ما أثرش عليا حقاش أنا لعارفة شنو كاين ..عاودت العام بحماس اخر ونسيت لعام لقبل جا الوطني وجا معاه نفس الألم ونفس المعاناة دوزت الوطني بزز بألم فااااق الأول بدرجات مانجحتش ومشيت إستدراكية وكان نفس المشكل للمرة الثانية ما كنجحش وها هو لعام ثاني في لباك كنرجع خاوية من جميع الدورات العادية والاستدراكية وهنا فين عنيت ديال بصح كلشي فقد الأمل في قريتي والديا خوتي إلا ختي وحدة حنان  لبعيدة  وللأسف حتى هي ما خداتش الباك وكانت كتشوف فيا نجاحها.. والديا قررو انني ما نرجعش مزال وااني نتخلا على فكرة القراية قالو بلي كلشي ولا عارفني غادة جيا بنت فلان هاديك وهادشي ما عندناش في العائلة.




ما غداش نقول تحديتهم وإنما حطيتهم أمام الأمر الواقع وقلت ليهم تجربة اخيرة باغاها ليا باش أنا نرتاح في المستقبل باش ما نوصلش مرحلة نقول فيها يريت ولا كون غير عاودت امكن نكون نجحت..ماباغاش ندم ونتحسر من بعد
كلامي ما قنعهتمش 100% والاب ديالي رفض اعاوني ولا يعطيني المصروف كيف كان قبل، هنا دخلات ختي وقررت تعاوني ماديا ومعنويا بشرط نجيب لباك .
هنا المسؤولية كبرات على الأول وزادت تعقدات.. آخر فرصة ما خاصنيش نرجع خاوية ..لكن ما لعبتش على هاد الأساس ولا لعبي كلو على انني ما نمرضش كيف مالفة في الوطني.. دفعت استعطاف لكياخد الوقت باش اتقبل وكان اكتضاظ هداك العام وحارس لعام قالي نسبة قبولك قليلة. لكن أنا ما تسوقتوش وهنا فين تحديت الإدارة وقلت ليهم إلا كانت نسية رفضي 99،99 % فنسبة 0،01% كتخلق ليا المعجزات، مشيت وختاريت قسم ووليت كندخل معاهم لدروس لمدة كثر من شهر هلي تقبل ليا الاستعطاف وهنا عرفت راسي خديت لباك ماشي غير تقبلت فيه .
كلشي تبدل الاساتذة وأطر الإدارة الأصدقاء كلشي مشا لنجح نجح ولسقط ما قدرش اعاود، وقريت مع بنات وولاد 2000 ههه، في هاد العام تربا فيا مبدأ التجاهل وانني نعيش نهار بنهارو والا خيابت دبا تزيان .

الجزء الثاني : في قلب الحدث مع إمتحان البكالوريا


قرب الوطني زدت من درجة المراجعة ديالي لأنه من بعد كل غشل كنتحطم وكنتأتر وبها كنسى كلشي حتى من دروس وكنمشي خاوية كيف انا عامين وكنرجع خاوية، مهم بربراسيو ديال الوطني 2018 جات مع رمضان كنفيق مع 6 صباح كنبقى نحفظ حتي المغرب ومن وراه كنبقى نحفظ حتال وقت الصحور وحدايا القهوة كحلا بقيت على هاد الحال حتى كنت انموت واحد النهار في ليل سكت ليا القلب لثواني وتشللت وصلات بيا أنني نشهد لكن ما قدرتش حتى تطلقت هلي عرفت انني زدت على راسي بزاف وكنت قريبة من موت بشعرة، جا الوطني لقاني مراجعة طفيت تلفون قبل ايام للامتحان باش ما يتاصل بيا حتى واحد وقول ليا ألله اعاونك دارنا قلتها ليهم دعاو معايا في خاطركم لكن ما نسمعهاش.. أنا لعارفة علاش!! .. ( عامين وانا كنمشي باش ندوز الامتحان وتركيزي كلو كبقى على دعوات الناس لما خاصنيش نخدل ثقتهم..عامين وانا كنمشي باش نجح ونرضي الناس)




جا الوطني لبست أحسن ما عندي ومشيت خدمت مزيان نهار أول ثاني ثالث بخير ديما كنمشي ضاحكة ونرجع ضاحكة وخا ما متأكداش من نسبة نجاحي لحقاش كلشي كان كخرج كبكي وكقول داكشي صعيب وفعلا كنت كنتزير بصعوبة الاسئلة وبحر الالم في الرأس ودموعي حابسينهم غير شفار ومع ذلك كنقول في نفسي ما خاصنيش نبكي ( ماتبكيش انعيمة بكيتي ما فيه الكفاية لمدة عامين. بكيتي في اربعة الدورات ولخامسة غادة تكون حاسمة)..
خواتاتي لبعاد والعائلة كتاصلو بالاب ديالي والام ديالي كسولوهم عليا واش خدمات؟ كيف دايرا ؟واش ما مارضاتش كيف مالفة؟ "لحقاش أنا طافية تلفون" كجاوبوهم حنا نيت ما عرفنا والو كتجي غا تكركر وكتقول الحمد لله والله واعلم هههه.
آه بصح كنت هاكا لكن الألم كان باقي لكن بحدة قليلة على لقبل تغلبت غليه قدر المستطاع وامنت بالباك ربي مكتبو ليا في لعام لخر وخاصني نجيبو ليا لراسي.

الجزء الثالث : لإعلان عن النتائج


جاو النتائج وكنت معولا على والاستدراكية وكان ديما كود مسار معكس وما كتفتحش ليا حتال لغد ليه..لكن هاديك ليلية تفتح ليا في الحين وإذا بي كنلقى راسي ناجحة بميزة مقبول ماشي شي نقطة في نظر الكثير لكن بالنسبة ليا ساويا بزاف وقيمتها عندي كبيرة.. ما صدقتش راسي وأخيرا نجحت حمد الله وبكيت ومشيت كنجري نفيق والديا خلعتهم لقاوني كنبكي ما فهمو والو مي تخلعات اسحابلي ما نجحتش فرحو ليا والواليد قاليا بصريح العبارة( صراحة ما كنتش معول عليك تنجحي)..جاوبتو ( ولكت نجحت أ با( وتاصلت بختي لفي لبعيدة ولكانت ديما مسانداني فيقتها قلت ليها نجحت كان جوابها كلو دموع وكان لباك ديالها هديتو ليها حقاش عوناتني من كلشي. .
الحمد لله 3 سنوات هلي خديت لباك ما ندمتش عليها لحقاش رباتني على الصبر والتحدي وانني في كل لحظة فشل كنزيد نتقوا ونعطي كثر وهادشي واضح في النقط لكنت كنجيب بقيت بشويا حتى جبت معدل المشرف ليا أنا ماشي لناس لحقاش أنا لعارفة كفاش جبتو بالمعانتاة ديالو.. وها أنا ليوم في لفاك درت التخصص لكعجبني ..اه أنا في لفاك بعيدة على الدار الأمر لكان مستحيل اتقبلوه عائلتي
نتمنى رسالتي تكون وصلات لأي بنت كتقرى واي واحد ماشي غير في الدراسة،نجعلو من الفشل والمعاناة دافع الإستمرار،نرجعوه دافع اوصلنا فين باغين.. إلا مانجحتيش ليوم راه باقي غدا وبعدو وإلا كان ماكان هاد العام راه كين عام اخر ستاغلو كل الفرص وياكم مادوزوش جميع الدورات والله اوفق اي وحد في دراستوا وحياتو وفي أي حاجة باغيها وكتمناها


نصائح لجتياز البكالوريا بنجاح



نصائح لجتياز الإمتحان الوطني


فهاد السطورا غنخلي ليكم نصائح لي تخليكم دوزوا عام زوين وناجح ان شاء الله و تحيدوا شوية الخلعة :

 الباكالوريا هي ختام التعليم الثانوي ديالكم , ضحكوا و نشطوا مع صحابكم و حاولوا دوزوا وقيتات زوينة حيت الذكريات ديال الباك بالضبط مكيتنساوش .. متبقاوش غي سادين على راسكم بديك الفكرة ديال لا الباك خاص الواحد يكون جدي بزاف و ميضحك مايسافر مايخرج را غيقدكم الوقت لكلشي ان شاء الله

طريقة تعامل مع المواد


المواد لي المعامل ديالها كبير فالامتحان الوطني فشعبتكم الله يرحم ليكم الوالدين بداوها من لول متخليوش الدروس يتراكموا عليكم, را الخدمة من لول هي لي كدير الفرق فالأخير , كتلقى واحد بدا تاقرب الوطني وكيقولك وا كون بديت من لول نجيب اكثر ولكن الندم مكينفعش را الايام مكيرجعوش و الاحساس بالندم اخيب حاجة اذن عافاكم الخدمة من لول.





غتبداو دروس جديدة كاين لي عمركم شفتوها ، فلول كلشي يقدر يبان ليك صعيب. الخايبة هي تقنع راسك بلي راك مكلخ و تستسلم من لول حيت يلا درتيها غتولفها و نهار الوطني المصحح مغيقولش هذا مسكين را غا معندوش مع المادة اجي نتساهل معه .المصحح مكيعرفكش يعني دوك الاعذار لي كنا كنخدموا بيه 12 عام هادي مبقاوش خدامين , خاص تبين لينا ماعندك تقاتل باش تفهم نتا ماشي مكلخ ولكن دكروا ديما بلي لي جابوا 19 ولا 18 ولا لي كان را ماشي كلشي كان كيجيهم ساهل ولكن اي حاجة فلول كتبان صعيبة والله غي نتقاتل باش نفهم سواء الساعات الإضافية سواء يوتيوب مهم غتفهم راك ذكي.

الشعبة العلمية عنداكم تركزوا على العربية و الفرنسية و الاسلاميات كاين لي كيبقى يدير ليهم البحوث و التحضير بحالا عندو فالوطني . يلا عندكم فيهم فروض خلي تال دقيقة 90 و ضرب عليهم طلة . ركز عليا على المواد الأساسية فشعبتك
متنساوش صفحتنا ديما معكم ان شاء الله


طريقة التعامل مع الأحدات والأشخاص لي غدي وجهك في الباك


1 - غتحسوا بالتعب و الفشل و القلق احيانا و تقدر نقطة شي فرض تكرهك كاع فالقراية و الباك ولكن ديما تعلم تحفز راسك براسك , ماجبتش مزيان ولا شفت راسي مقلق غي راسي نجلس و نصارح راسي بنقط ضعفي . شخصيا كنت كنكتب فورقة مواطن الضعف ديالي بالنسبة للدراسة و كنركز على انني نصلحها وكنواعد نفسي يلا صححتها فواحد المدة غانشري لراسي مثلا شي حاجة باغاها بزاف ولا نمشي لشي بلاصة زوينة . هاد الطريقة كتحفز الذات وكتريح نفسك مني كتعرف شنو نقط الضعف لي كانوا معصبينك




2 - متكونش اناني , جا عندك شي حد بغاك تشرح ليه شي حاجة متقولش لا غيفوتني واخا يكون داك الشخص معندكش معه , دير الخير ونساه و غتشوف شحال غيجازيك الله على الخير لي درتي . عندك شي سلسلة ولا موقع ولا قناة كتخدم بيهم و نفعوك شاركهم مع صحابك خصوصا لي بانوا لك مستواهم ربما ضعيف و محتاجين لي يفكر فيهم بهاد الجيست

3 - يلا كنتي مدمن بزاف على احدى مواقع التواصل و شفتي راسك مكتوفقش بين القراية و الموقع بحال انسطاكرام مثلا غي حيدوا نصيحة بالتجربة, وقت السهرات الليلية فالتصفح و الهضرة مزال وقتهم ان شاء الله طويل مني تكون نجحتي بالنقطة لي تمنيتي ولكن يلا ضيعتي فيهم الوقت وخليتي الباك غتندم بزاف مني يقرب الوطني . اي حاجة كتلهيك كون صريح مع نفسك بلي كضيع لك الوقت وحيدها مؤقتا

4 - بعدوا من دوك الماركة ديال " ناري كتقرا بزاف كتعذب راسك " " غتكون ساليتي المقرر واقيلا حفظتي تا الفهرس " .. هادو فئة معقدة مكيبغيو تا حد يفوتهم و كيبردوا الحقد لي فيهم بهاد الطريقة . سد ودنيك و انسحب من هاد المجموعة بهدوء خليك غي مع الناس الايجابيين تاتوصلوا دقة دقة

في الأخير أتمنى أن تكون قد إستفدت من هده التجربة ومن هده النصائح، التي أرجو منك أن تشاركها مع أصدقائك ليستفدوا هم أيضا منها نظرا لأهميتها لأي شخص في هده الفترة وشكراا

تعليقات