القائمة الرئيسية

الصفحات

تجربتي مع البكالوريا ب4,84 في الجهوي


تجربتي مع الباك


مرحبا بك في هدا الموضوع سوف نقدم لك تجربة من الواقع لأحد التلاميذ الدين حصل على شهادة البكالوريا .

مباشرة من تسليم نقط الجهوي لي تصدمت منين شفتها لقيت 4،86 قلت مع راسي مستحيل انني نجح فالباك علما انني قد عاودت سيزيام جوج دلخطرات مرة لولة كنت جبت فالجهوي 6،71 ولكن محالفنيش الحظ في المراقبة سقطت وعاودت لعام ونجحت فالمراقبة ولكن جبت فالجهوي 4:86 يعني صدمة وخيبة كتكون مضاعفة هذه نقط لي دزت بيها لباك مباشرة وخا كنت ديك لوقيتا عارف راسي مناجحش ولكن اللهم نلتحق بالركب و القطيع حسن منعاود مع ولاد 2004

مهم و انا كنفكر داك صيف كامل فنقطة ديال لجهوي لي دارت ليا إحباط طيحات لي مورال اذا بي كنطيح على واحد فيديو سيفطوو ليا القدرر مكتوب عليه "شديت لباك ب 0:98 في الجهوي" تاع واحد تلميذ كيقرا عند استاذ معجزة الذي له فضل كبير عليا في احياء اﻷمل في قلبي، مهم عندما شاهدت الفيديوو قلت واه هذا جاب الباك ب ديك النقطة وانا عندي نقطة الجيهاوي طالعها عليه، مدام هوما خدمة تجابو لباك بدووك نقط المتدنية حتى انا نخدم على راسي ونجيبوو فعلا الفكرة تاع النجاح بداك معدل فالجيهاوي طايح بدات كتذخل ليا راسي وعرفت بأنني نقدر نحقق شي لعبة.




تقريبا قبل دخول الموسم الدراسي الجديد واﻷخير بالنسبة لي كنت كنقاد واحد الخطة ملائمة نمشي عليها العام كامل لي من خلالها يمكن نضمن نجاح لو تبعتها بالحدافير تاعها حتى انني تمنيت لو دازز صيف كاع ذغيا غارر باش ندخل نقرأ كنت متشوق بززاف لقرايا وعندي حماس كبير ليهافاش

الجزء الأول : بداية المعركة مع الباك 


وصل موسم دراسي بدينا الدخول انا وبعض اﻷصدقاء وكانت المفاجأة انهم جمعوني بيهم فتلك السنة اﻷخيرة تاع الباك وقلت الله الفرحة كملات غاذي يذوز عام ززين ولقيت معامن نتفاهم، ولكن ماهية إلى ايام واسابيع حتى تبخرات ديك الفرحة وانقلبت حززن حيث جا قرار من إدارة المؤسسة بأنهم غاذي يتغيرو اقسام من قسمين إلا ثلات اقسام ويقدر منجيش مع دراري لي كنعرف، وفعلا بعدما خرج تقسيم ذيال اقسام مجيتش مع اصدقاء لي بغيت..جابوني فقسم اخرر مبرهش، محملتوش ف اول مشيت عند المدير و الحارس العام ماشي مرة ماشي جووج باش يغيرو ليا القسم حيث عارف إلى قريت فيه لعام كامل محالاش واش نجح ولكن إدارة لﻷسف كتعطيك وعود كاذبة وكتصبرك الهدف تاعها هو تفرق تلاميذ على اﻷقسام بحال القطيع بنوامر مكيهمهاش ان المستقبل د تلميذ غاذي يضيع ..المهم شربنا هاذيك بجغمة دلما وخا الخطة لي كنت كنبلاني ليها فالصيف تخربقات هاذشي لي جعلني نفكر نبتكر خطة جديدة .





الجزء الثاني 


المهم بعدما تخربقت ومشاو الخطط و الطرق اللي كنت مبلاني ليهم قررت نفكر ف خطة جديدة اللي ممكن نحقق بيها النجاح آخر، صراحة مكنتش نخبي عليكم كنت كنتغيب بززاف ف دورة الأولى لدرجة أنني سنيت جووج التزامات د الغياب حتى الحارس العام قال ليا نتا كثرتي فهادشي ديالك رآه شي نهار نطردوك .. كنت كنجاوبوا بلي صافي غادي نتغير و نتلزم بالحضور، لكن للأسف المدارس و اللسيات و الجامعات ديالنا مكيراعيوش للشرط الإنساني للتمليذ مكيشوف بلي هاد التلميذ يقدر هو عندو مشاكل عائلية ولا نفسية كتخليه ما يمحلش يقرأ او كتمنعوا من الدخول هوما كينظروا ليك فقط نظرة سطحية خالية من تضامن نتا بحال شي آلة خصك تبقى تحضر و سلام ماشي سوقنا فداركوم ولا عائلتكم مهم تقريبا الدورة الأولى سالات شدينا عطلة قريب نتسلموا نتائج كنت معول أنني نجيب على الأقل واحد 14 باش نعوض الجهوي لكن .
كنت كنراقب الأخطاء اللي درت الدورة الأولى كنحاول منعاودهاش ف الدورة الثانية، بين ما أنا كنفكر ف المراجعة لقيت راسي فات عليا الكار الدورة الثانية قربات تسالي (3 أشهر ) الامتحان جاي و الدروس ديال الدورة الأولى مشاو عليا أنا مكاتب والوو بحكم كثرة الغيابات و التلاعب، اشغادي ندير يارربي طاحت عليا واحد فكرة علاش ما نبحث على الدروس ديال الدورة الأولى ف اليوتيوب ولا جوجول. فعلا داكشي اللي درت لكن اشنو نقول ليكم المسألة كانت صعبة كتحتاج قدرات استثنائية و صبر باش تفرج ف الدروس ف اليوتيوب و تبحث عليهم على شكل PDF مسألة صعبة عندها مخاطر حيث مكاينش توجيه و نتا مفاهم حتى علاش كتقلب وناجح الأعوام كامل غار بنقيل تجي واحد العام ديال لباك تقرر أنك تبدأ تراجع نتا مكلخ، مهم مع كامل هاد الاحباطات كنت ناووي نجح كنقول ديما مع رأسي دب يمشي هادشي كامل تشد.كارطونة أي طريق كتبدها مغاديش تلقاها مفرشة بالورد لو كانت كذلك لكان كلشي مشا فيها ضروري تسلح بالصبر و تخلي راسك موتيفي إلا مكانش عندك حافز خلقوا، مهم بديت كنطل إطلالة سريعة على المواد اللي عندي ف الوطني كنشوف دي فيديوهات ديال أستاذ كيشرحوا كيبسطوا داكشي بعدا شويا شويا بديت كنفهم مخي بدأ كيتفتح كنعرف كيفاش نطبق المنهجية و نكتب النص إنشائي عرفت المحاور مهم خديت فكرة على كل مادة بإستثناء الإنجليزية مكنتش كنفهم فيها والو لأنها لغة .. مهم ركزت على المواد اللي عندها معامل كبير ديك عطلة دورة اللولة كامل قضديتها مراجعة كنوض لفجر نتوضا نمشي نصلي جامع رجع كنفطر مع وجبة فطور كنتفرج فيديوهات تاع دكتور " عدنان إبراهيم " هاد رجل له فضل كبير عليا يد بيضاء بأنه نور عقلتي حل ليا مخي بديت كنفهم بززاف د الحوايج حبب ليا العلم و القراءة بفضله جاتني قراءة د المقررات ساهلة لأنه ديجا أنا فاهم بززاف د الحوايج .



الجزء الثالث 


 مهم ملي كنسالي فرجة و فطور كنستعد للمراجعة كنتفرج فيديوهات تاع أستاذ كيشرحوا دروس مثلا ناخدوا فلسفة كنعقل داك شرح كنحاول نفكك المادة ( مجزوءة و مفهوم و محور ) كنشوف كل واحد فيهم اشنو اللي خاص يتفهم و يتراجع وواشنو ديال لحفاظة حاجة ديال الحفظ كنكتبها ف ورقة كنزوق داكشي باﻷلوان كنحطها على جنب الحاجة ديال الفهامة كنحاول نفهمها ديك اللحظة عبر الفيديوهات د اليوتيوب مهم استمر الوضع شحال بنسبة طريقة الحفظ إلا كانت حاجة كثيرة كنحاول نقراه بززاف د لخطرات باش يدخل لدماغ، مهم بقيت هكا ف كل الدورة الثانية داك التبرهيش ف القسم حيدتوا و داك الخروج بززاف نقص حتى الغياب حاولت ما أمكن نحيدوا إلى للضرورة .. كنت كنمشي لاصال مع دراري كان طاحت عليا فكرة علاش ما نقولش دراري يبداو حتى هوما مراجعة كيما بديتها حتى يحيدوا عليهم ديك فكرة ديال قطع لصق ولا ندي تيليفون مهم طرحتها عليهم فيهم اللي عجباتوا فكرة فيهم كيسخر كيقول ليك نمي لا نجحتي داك شخص اللي قالها عقلت عليه مزاال كيفاش جاتوا استدراكية ندم اللي ما تبعش كلامي لكن ساعدتوا بعض جوانب حتى تمكن من نجاح مهم ، بدينا الفكرة ديال المراجعة الجماعية كنت كنمشي أنا كنبحث فيديوهات و نقلب ف الدروس PDF جوجول الدفاتر إلخ نجيب دراري داكشي كامل نشرحوا ليهم مع العلم أنهم كامل جايبين نقط مزيانا و حسن مني ف المراقبة و النفط ديالكم طالعة عليا ف الجيهاوي إلا أنني قلت اللهم لا حسد هوما خوتي نساعدهوم وخا ينجحوا نسقط أنا ماشي مشكل مهم الله مكيخيبش الإنسان كيوقع الناس يفرحهوم .. مهم ما بغيتش نبقى نذكر هاد الحوايج هوما كثار لأن الحديث عن النفس مدخول داكشي كيبقى عمل لله ما يحتاج يتعاودش للتباهي به قدامكوم، مهم بعد فاش دوزنا الفروض .

الجزء الرابع 


دوزنا الفروض وخا كنقل فيهم حيث كنت مشغول شوويا بمراجعة اللي فات من الدروس الدورة الأولى كنحاول نمذج و نمزج مابيناتهم لكن هاد الخطرة النقلة كنت عارف اشنو كنقل ماشي غار كتابة خاوية حتى بعض الأستاذة تعجبوا قالوا ليا كيفاش تغيرتي 180 درجة، كنت كنحاول نتجنب الإجابة كنكتفي بصمت بغيت النجاح ديالي يكون وواقعي .. كنت نعقل واحد الأستاذة كانوا يشدو فيها دراري واحد لخطبة معارف مالها معايا قالت ليا نتا مابغيش تقرأ يا غبي كذا كذا ههههه، شفت فيها قلت ليها شتي هادشي اللي كتقريهم غادي نراجعوا ف الليلة د الامتحان غادي نجح وونشد لباك غادي ندق عليك نوريك نتيجة ههههه ولاد لحرام دراري كيشعلوها، هذا كيتحداك اااستاذة هي مفهمات والو بقات غاكتشوف .. مهم بقينا على فكرة الباك و النجاح وخا كتجيني بعض شكوك ف نفسي قدراتي وبلي نتا عندك 4 جيهاوي و 11 دورة الأولى كي بغيت دير تنجح شي حاجة مستحيلة .. لكن مع ذلك بقيت ملتزم بالعزيمة و الإسرار بلي غادي نجح نتبث دوك تلاميذ بلي هضرتهم خاوية و لﻷساتذة بلي أنا ماشي داك شخص غبي و كسول اللي يعاود العام الجاي عندهم بقيت مقاتل مع الدروس و القرايا و الفيديوهات إلخ مع اقتراب معود الإمتحان تقريبا شي 20 يووم مشيت عند دراري شرحت ليهم شي لعيبات قلت ليهم أنا هاد 15 يوم قبل إمتحان ما بقيتو تشوفوني حتى لاصال قطعتوا .. دخلت تكمشت دارنا كاع داكشي اللي كتبت ف الوراق ديال الحفظ جاء وقتوا الآن نحفظوا .

 مهم ديك 15 يوم قبل إمتحان قسمتها على جوج مواد رئيسية مادة الفلسفة غادي تعطيها 4أيام للحفظ للمفاهيم و المواقف و ضبط المنهجية د السؤال و المقولة و النص ، مادة العربية عطيتها 11 يوم ركزت على ضبط المنهجية ديالها و قسمتها إلى قسمين قسم خاص بالنصوص ( هذا كيتطلب حفظ المقدمات و المنهجية الخاصة لكل النص تفريق بيناتهم ) الشق الثاني ديال المؤلفات ( هذا كيتطلب حفظ المقدمات و الخاتمة ديال كل من الكتابين و معرفة أحداث و ماذا وقع ف كل من هاد الكتابين يقدر تقلب على تلاخيص باش تفهم كتاب " ظاهرة الشعر العربي الحديث " يكمن تستعن بفيلم واحد رواية فيهم " اللص و الكلاب " ) مهم هكاك مشيت كنت كنفيق مع 5 دلعشيا ف رمضان كنمشي نيشان مراجعة كنبقى عليها حتى كي كنسمع الأذان عاد نوقف وراء فطور كنمشي نضور أنا واحد صديق كنتناقشوا من بعد كل واحد كمرجع دارهم كنمشي نتفرج بعض افلام ولا شي مسلسلات ولا محاضرات او قراءة كتب .. بين ما يوصل سحور كنتسحر كنمشي نصلي و نرجع لدار كنهز ثاني كثرة الوراق نبدأ ف الحفظ نتفرج فيديوهات باش نرسخ الأفكار مهم بقيت على هادشي ديك 15 يوم قبل إمتحان صراحة مكانتش ساهلة و ماكنتش صعيبة خاصها تعب و جهد و صبر و مثابرة .. وفي ليلة الإمتحان مع دراري جالس بقينا كنتناقشوا اشنو ممكن يتحط و اشنو اللي محال مهم أنا موجد لكامل ما مسوقش .. واحد شوويا تفارقنا باش كل واحد يمشي يدير لمسات الأخيرة ديالوا يمشي يتسحر وخا كاين اللي شحط رمضان ههههه ماشي مشكل .. مهم الوقت كتدوز حتى وصلات 7 د صباح كنسمع دري كيعيط ليا ايووب خرج اصاحبي لوقت هادي مهم جمعت كونفوكاسيون و لاكارط ناسيونال ستيلو وفي طريقي .

الجزء الخامس 


 في طريقي كنتفكر كل داك سيناريوهات د العام بالخايب بالزوين بالغيابات باﻹعاقات بالمشاكل النفسية و العائلية بالجهد و المراجعة و الفيديوهات و القرايا و التعب و التكرفيص ها هو كلشي داكشي مشا ارا لينا اشنو جمعتي كامل فهاد العام حطو ف ورقة إمتحان .. حقيقتا داكشي اللي خديت ديك تجربة خاصوا يكون ف كتاب ماشي ورقة إمتحان .. مهم دوزنا العربية عرفتي مع طحت داكشي جاني ساهل فرحت ولكن باش تحط ليك ورقة تجيك ساهلة خصك تسهر ليلالي تبحث و تقلب و تقرأ ووتابع تحضر للشرح إلخ ماشي ساهلة مهم دوزنا داكشي كامل دازز مزيان إلى الإنجليزية كنت معول نقل فيها ولا غار يدوز ليا شي واحد مهم وخا هكاك خربقت فيها شي لعيبات بعض أسئلة وراهم ليا واحد صديق .. مهم دازز داكشي مزيان أخيرا إنتهى ذلك التعب و الحفظ و المراجعة و الفيديوهات د القرايا إلخ بقيت عاطيها غار راحة و نعاس حتى استدراكية مكنتش موجد راجع ليها .. مهم مع اقتراب موعد النتائج ف واحد ليلة ف رمضان كنشوف بنادم كيلوح ديك ( واوو نجحت الحمد لله ..) كتشوف كتقرا الناس كيباركوا ليه .. أنا صراحة تخلعت دوك دراري اللي وريتهم كيفية المراجعة حتى هوما نجحوا فرحوا والديهم بعدما كانوا ساقطين 2 عامين ف لباك ولعام 3 هو هذا القدر سيفطني ليهم باش نغير ليهم طريقة باش كيفكروا و نعطيهم طريق نجاح .. كلهم صراحة ما نكروش جميل سيفطو ليا رآه نجحنا شكرا اخوويا بززاف الله احفظك هادشي بسبابك نتا لعقبا ليك إلخ .. أنا مقديتش نشوف نتيجة ديالي ف إميل عطيت واحد ولد خالتي كود وداك تخربيق كنتظر الإجابة منو واش ناجح ولا ساقط ولا مستدرك .




مشيت كنتفرج شي فيديوهات ف اليوتيوب بين ما يوصلني لأخبار واحد شوويا من بعد ساعة تاع روطارر طلع ليا ميساج ديال ولد خالة مقديتش نشوفوا خفت لن نكون ساقط ولا مستدرك .. لقيتوا كاتب ليا " تفوو عليك كسول مكلخ مكتراجعش دروسك هانتا مستدرك سير هزز دفاتر راجع ليك راطرباج " .. مع قريت ميساج تصدمت طاح تيليفون من يدي اشهاد شي يارربي أنا درت جميع أسباب د النجاح و سقطت كنتفكر دوك شهور كامل مراجعة متعبة و سهر ليلالي تقلاب على قنوات كتشرح دروس مشات فابورر .. يلاه كنت نطفي تيليفون نسدو بخطرة قلت ولله ما نراجع استدراكية إذا ولد خالة مسيفط صورة مسيكرينيها كنت كنتسناها تشارجا نشوف اشنو نتيجة لمواد اللي طيحوني وخا ممراجع والو .. إذا بي كنلقى راسي ناجح وهو مسيفط ليا اديوو .. ماتنسا زردة أولد لعبد ههههه ولد لحرام طيرها مني خلعة عرفتي مصدقتش واش نجحت فعلا و مشيت فيقت مالين دار كامل وووللله إلا نجحت كامل العائلة سيفطت ليهم واتساب اديوات د نجاح كاملهم باركو ليا واحد فرحة زعما لهلا يحرم شي ولد الناس منها .. من هادشي كامل ميساج الحقيقي بغيت نوصل ماشي هو .






الجزء السادس 


 ميسااج من هادشي كامل ماشي هو أنني شديت لباك ولا نجحت لباك هو مجرد بوابة ﻹكتشاف عالم آخر د الحياة الجامعية .. مهم هو أنك نتا كنتي كتسمع من المحيط ديالك راك مغاديش تنجح جايب 4 جيهاوي نتا راك كسول نتا راك فاشل نتا و نتا إلخ كامل هادشي كتسمعوا من عند عائلتك و أستاذة و تلاميذ و محيط إلخ ولكن نتا متسوقتيش ليهم خطارتي طريق العقل و التجربة .. كامل دووك اللي كانوا يقولوا بغينا نراجعوا لكن جيهاوي عندنا ضعيف ملي شافوني نجحت معجبهومش الحال قاليك غار تزرفنا هوما ماشي تزرفوا إنما ولفوا الإدمان على الخروج مع الأصدقاء ولفوا الإدمان على سيريات و الأفلام و لفوا ضوران فايسبوك و انستغرام و سنابشات إلخ هادشي كيخليهم مقيدين العادات و التفكير مكيقدوش يغيروا رأسهم الأحسن حيث دماغهم تعود الحاجة الساهلة اللي مافيهاش تعب ولف العكزز كيحب الجهل و أدبيات الجهل مثل ما قل ودل ما تبقاش تفلسفش خلينا نعاودو تفاهات ديالنا بحال نماذج إلا بغيتي تنجح ف مسار دراسي عطيهم تيساع لأنك ملي تحقق راسك تلقاهم مزال كيما هوما بنادم الرؤية عندو منعدمة مكيبغيش يسمع شي حاجة فيها إستخدام طنجربة اللي عندك ( العقل ) والو كيفكر غار ف الأكل و النوم و التصاحيب و التفاهة الخاوويا عالة على والديه و مجتمع ما تمزكش ليهم خليهم ينبحوا صنع مسار حافل بنجاح يليق بك ساعد أصدقاء ديالك باش ينجحوا ف حياتهم يفرحوا والديهم ،متنساس النجاح و البطولة كتجي من التعب و السهر و الحفظ و البحث لو كانت ساهلة كان كولشي نجح ما سمي نجاح إلى لأنه فئة قليلة اللي كتستطع تحققوا متنساس كون جاد في دراسة ديالك متلعبش فيها و بقا قرأ كتب علمية او ثقافية او فلسفية أو سياسية إلخ تسنط محاضرات ولا تفرج برامج وثائقية عمرك راسك مززيان باش تعرف تولي تعرف تكلم و تعرف تكتب و تولي عندك مكانة إجتماعية بين الناس و تحياتي سمحوا ليا .




أتمنى نكون قدمت ليكم جزء بسيط من إفادة اللي عندو شي سؤال مرحبا يمكن ليك تحطو في التعليق أسفل هدا الموضوع أو تراسلنا عبر صفحة إتصل بنا أو عبر صفحة الفيس بوك الخاصة بموقع مول التلاخيص .

الله يوفق الجميع.
  • فيس بوك
  • بنترست
  • تويتر
  • واتس اب
  • لينكد ان
  • بريد
author-img
MaZart

عدد المقالات:

شاهد ايضا × +
إظهار التعليقات